ሎመዓንቲ ኣብ ላዕለዋይ ቤት ፍርዲ ፌዴራል ምድብ መጋባእያ ልደታ ብገበን ግብረ ራዕዲ ዝተኸሰሱ ዶክተር መራራ ጉዴና ቃሎም ሂቦም።

ዶክተር መራራ እቲ ተግባር ኣይፈፀምኩን ገበነኛ እውን ኣይኮንኩን ኢሎም ቃሎም ዝሃቡ ኾይኖም ጠበቓኦም ድማ ኣብ መበል 11 ወርሖም ሎሚ ቃል እምነት ክሕደት ምቅራቦም ከምዝተደናጎየ ነቲ ቤት ፍርዲ ኣቅሪቡ እዩ። ብክፋል ዝቐረቡ ስድርኦምን መሓዝቶምን ክሓትዎም ክፍቀደሎም ነቲ ምድብ መጋባእያ ዝሓተቱ ኾይኖም እቲ መጋባእይ ድማ ሕቶኦም ብፅሑፍ ከቅርቡሉ ኣዚዙ እዩ። እቲ ቤት ፍርዲ ምስ ጉዳይ ዶክተር መራራ ጉደና ዝተኸሰሱ 2ይን 5ይን ተኸሰስቲ ኣብ ዘየለውሉ ጉዳዮም ክርኣ እውን ኣዚዙ እዩ። ዶክተር መራራ ኣቦ መንበር ኮንግረስ ፌዴራሊዝም ኦሮሞ እንትኾኑ ኣብ ክልል ኦሮሚያ ህውከትን ዕግርግርን ክልዓል ቐስቒሶም ብዝብል ኣብ 28 መስከረም 2009 ዓ/ም ዝተኣወጀ ኣዋጅ ህፁፅ እዋን ተሓላሊፍሎም ብዝብል ተኸሲሶም ምንባሮም ይዝከር ይብል ፀብፃብ ኤፍቢሲ።